SCI, SCIE (Science Citation Index ба Science Citation Index Expanded) гэж?

SCI, SCIE гэдэг нь Science Citation Index ба Science Citation Index Expanded гэдэг үгсийн товчлол юм.
Гол утга нь Байгалийн ухаан болон техник технологийн чиглэлийн судалгааны ажлын индексийг илэрхийлнэ. Энэ нь тухайн эрдмийн ажил хэвлэгдсэнээсээ хойш бусад хүмүүсийн эрдмийн ажилд хэчнээн удаа иш татагдсан болохыг харуулдаг.
АНУ-ын Institute for Scientific Information хэмээх байгууллагаас сэтгүүлд хэвлэгдсэн өгүүллийн индексийг хариуцан явуулдаг. Нийгмийн ухааны салбарын хувьд SSCI (SOCIAL SCIENCE CITATION INDEX), Хүмүүнлэгийн салбарт A&HCI (ARTS & HUMANITIES CITATION INDEX) гэж тус тус бий.
Тэгэхээр SCI paper эсвэл SCI level paper гэвэл дээрх ISI-д бүртгэлтэй өндөр зэрэглэлийн сэтгүүлд хэвлэгдсэн эрдэм шинжилгээний өгүүлэллийг хэлнэ.

Өнөөдрийн байдлаар SCI түвшний 3731, SCIE түвшний 6610 сэтгүүл ISI-д бүртгэгдсэн байна.
SCI түвшний 3731 сэтгүүл байгаа хэдий ч энэ дунд Computer Science, Information System чиглэлийн 24 сэтгүүл л бий. Тэр дундаа Computer Network, тэгээд Security чиглэлээр хийсэн бүтээлээ хэвлүүлье гэвэл тэрнийг хэвлэчихээр тэр чиглэлийн сэтгүүлүүд гэж хуруу дарам цөөхөн. Ядахад энэ сэтгүүлүүд нь жилд 2-6 удаа гарах ба нэг хэвлэлтэндээ цөөн хэдхэн(3-8 гэх мэт) өгүүллийг л нийтэлдэг. Тэр хэдхэний тоонд орох эрдмийн ажил ч үнэхээр мундаг, шинжлэх ухаанд лут хувь нэмэр оруулсан эд байхаас өөр аргагүй. Тэгэхээр PhD горилогч этгээд SCI түвшний сэтгүүлд хэвлэгдсэн дор хаяж нэг өгүүлэлтэй байж төгсөнөө гэвэл тэр Америкийн TOP 10 сургууль Stanford, MIT http://tegshbayar.blogspot.com/2007/02/100.html зэргээс л хааяа нэг Computer Science - аар доктор төгсөх байх...

Гэхдээ SCIE гэж авралын гарц байнаа. Springer-ийн Lecture Notes... цувралууд SCIE зэрэглэлтэй байдаг. Жишээ нь: Lecture Notes in Computer Science (LNCS), Lecture Notes in BioInformatics (LNBI) гэх мэт цуврал сэтгүүлүүд их байдаг. (2007.1.1-нээс эхлээд Lecture Notes in Computer Science (LNCS), Lecture Notes in Artificial Intelligence(LNAI), Lecture Notes in BioInformatics(LNBI) энэ гурван цуврал сэтгүүлүүд SCIE ангилалаас буусан байна. Шалтгаан нь мэдээж чанар тааруухан олон тооны paper хэвлэгдсэнээс болсон. Харин Lecture Notes in Control and Information Sciences(LNCIS), Lecture Notes in Mathematics (LNM) SCIE ангилалдаа хэвээр байна лээ.)

SCI сэтгүүлийн шүүлтүүрийг давахгүй ч гэсэн SCIE сэтгүүлд бүтээлээ хэвлүүлээд байвал бас л олон улсын хэмжээнд түмэн амьтны бүтээл дундаас шилж сонгож хэвлэж байгаа юм болохоор судалсан, хийсэн ажил маань хүлээн зөвшөөрөгддөг. (TOP10-д багтахгүй сургуулаас ч гэсэн доктор, магистр төгсөх хэрэгтэй биз дээ ^^;)

SCI, SCIE сэтгүүлүүд дотроо ч гэсэн чансааг нь ялгахын тулд Impact Factor ба Acceptance rate гэсэн хоёр зүйлийг хэрэглэж ирсэн.
Impact Factor нь тухайн сэтгүүл хэвлэгдсэнээс хойш тодорхой хугацааны турш хэвлэгдсэн бүтээлүүд хэчнээн удаа бусдын бүтээл дээр ишлэл болсон тоотой шууд, нэг дор хэвлэгдсэн бүтээлийн тоотой урвуу хамааралтай. Ингэхээр сэтгүүлүүд IF - ээ өсгөхийн тулд нэг удаагийн хэвлэлтэндээ аль болох үнэн чанарлаг цөөхөн бүтээлийг хэвлэнэ.
Acceptance rate нь ихэвчлэн Proceeding -д хэрэглэгдэх бөгөөд хэчнээн бүтээл хүлээн авч хэдэн хувь нь хүлээн зөвшөөрөгдсөнийг харуулна.
Ер нь хамгийн ихдээ 40% дотор байдаг. Ихэвчлэн 10-20% хооронд байна. Ө.х: 100 бүтээл ирэхээс 10-20 бүтээл хэвлэгдэнэ гэсэн үг юм. Хэрэв acceptance rate 40%-с дээш гарвал ер нь тэгээд тэр хурал, сэтгүүл дампуурна гэсэн үг ^^;.

Азийн шилдэг 2000 сургууль ба бас бусад зүйлс

1 Korea Advanced Inst. of Science & Tech 90.79
2 Pohang University of Science & Tech. (South Korea) 81.07
3 Indian Institute of Technology, Bombay 75.01
4 Indian Institute of Technology, Delhi 73.39
5 Indian Institute of Technology, Madras 72.10
6 Tokyo Institute of Technology* 71.44
7 Indian Institute of Technology, Kanpur 70.59
8 Indian Institute of Technology, Kharagpur 69.82
9 Nanyang Technological University (Singapore) 67.75
10 Taiwan University of Science & Tech* 67.32

Эхний 10 нь гэхэд ийм байна. Дараахь гогцоосоор орж дэлгэрэнгүй хараарай.

http://www.asiaweek.com/asiaweek/features/universities2000/scitech/sci.overall.html

Энэ нэг Энэтхэгийн IIT-нууд гэж хэсэг аймаар сургууль байнаа.
Бүх хүн л оо мундаг мундаг гэлцдэг хэдий ч... бас яг үнэндээ бүх оюутнууд нь тийм ч мундаг биш юм шиг над санагдсан. Зэргэлдээ судалгааны өрөөнд хоёр энэтхэг магистрант байдаг юм. 2-лаа IIT-гаас ирсэн л дээ. Юу хийж байгаа нь хөрш надад илт харагддаг, бас байнга ярилцдагийг ч хэлэх үү. Нэг нь бол гайгүй ээ. Овоо юм билээ. Нөгөө нь үнэн найгүй, энгийн юм хүртэл сэтгэж, хийж чадахгүй (тийм залхуу юм уу, тийм толгой муутай юм уу мэдэхгүй). Мэдээж хаа хамаагүй нэг газраас ирсэн ч биш, магтсан IIT-г төгссөн гэхэд арай л гомдмоор баагий даа..

Харин Солонгост KAIST (Korea Advanced Inst. of Science & Tech), POSTECH (Pohang University of Science & Tech) гэж хоёр онгироо сургууль байх юм. Мэдээж Science & Tech талын судалгаа, сургалтаараа Ази тивд тэргүүлэхээс гадна эдний төгсөгчид нь гэж үнэн аймаар. Энэ хоёр сургуулаас бакалавр, эсвэл магистрийн диплом авсан солонгосууд АНУ руу Postgraduate-д сурахаар их явдаг. Ер нь л MIT руу шууд орно доо. Мэдээж Stanford, Caltech, Princeton, University of California at Berkeley гэх мэт TOP10-ууд руу ч шууд л ордог.

http://web.mit.edu/iso/stats_06-07/general0607.shtml

Энэ гогцоосноос харвал MIT-ийн 2006-2007 оны хичээлийн жилд гадаад оюутнууд (Америк биш) Graduate School-ийн 35.09% хувийг эзэлж байгаа дотроо хамгийн олон нь Хятад, Солонгос, Канад, Энэтхэг энэ дөрвөн улсаас ирсэн нөхдүүд байх аж.
Хүн амын тоотой нь харьцуулбал энэ дунд Солонгос, Сингапур хоёр л ялгарч байна.
Үүнд Ази тивийн номер 1, 2 сургууль KAIST, POSTECH хоёрын сургалт, төгсөгчдийн чанар үнэхээр гол хувь нэмэр оруулж байгааг дурдууштай.

Хэзээ монголчууд MIT, Stanford зэрэг TOP сургуулийн гадаад оюутны эзлэхүүнд эхний 10 улсын тоонд ороод явах юм бол доо. Тэгэхийн тулд Монголын боловсролын системийн сургалт үнэхээр чанартай, гадаадад өрсөлдөхүйц хэмжээнд очих ёстой билээ.
Бүгдээрээ дор бүрнээ санаж, шаргуу хичээж явцгаахад тэр цаг мөч удахгүй ирэх болноо гэж миний бие итгэж явна.

Бидний Монголын ухаант үрс маш олон болох болтугай.

Компьютерийн ухааны чиглэлээр АНУ-ын шилдэг 100 их дээд сургууль

Эхний 20-г нь л орууллаа. Үлдсэнийг нь http://www.vyomworld.com/gre/cslist.asp эндээс харна биз ээ.

Миний мэдэхээр 8-д байгаа сургууль UIUC-д надтай адилхан Security чиглэлээр докторантурд нэг монгол эгч суралцдаг юм билээ ^^;

1. Stanford University
2. Massachusetts Institute of Technology
3. University of California Berkeley
4. Carnegie Mellon University
5 Cornell University
6 Princeton University
7 University of Texas Austin
8 University of Illinois Urbana-Champaign
9 University of Washington
10 University of Wisconsin Madison
11 Harvard University
12 California Institute of Technology
13 Brown University
14 University of California Los Angeles .
15 Yale University .
16 University of Maryland College Park
17 New York University
18 University of Massachusetts Amherst
19 Rice University
20 University of Southern California

XXI зуун сангийн тэтгэлэгт хөтөлбөрт хамрагдан суралцахын давуу талууд

Өнөөдөр Монголд гадаадад гарч суралцах олон янзын гарц, тэтгэлэгт хөтөлбөрүүд байнаа.
Жишээлбэл: Улс улсын ЗГ-ын тэтгэлэг, Соросын сангийн тэтгэлэг гэх мэт ер нь бол зөндөө зөндөө.
Мэдээж бүгд л өөрийн гэсэн онцлог, давуу сул талуудтай билээ. Энэ удаад би XXI зуун сангийн тэтгэлэгт хөтөлбөрийн хүрээнд гадаадад суралцахын давуу талуудаас зарим нэг зүйлийг тодруулан бичихийг хүслээ.


1. Сонгон шалгаруулалтанд тэнцсэн л бол бараг бүх төрлийн мэргэжлээс өөрийн хүссэнээ сонгон суралцах боломж:
Цөөн хэдэн үл зөвшөөрөх мэргэжил(Үүнд: Анагаах ухаан, Гадаад хэл, Боловсрол судлал багш зэрэг орно)-ээс бусад олон мэргэжил дундаас тэнцэгч өөрийн хүсэл сонирхолдоо нийцүүлэн чөлөөтэй сонгон суралцах боломжтой юм.
Бусад улс орнуудын засгийн газраас зарладаг мэргэжлүүд нь хязгаарлагдмал бөгөөд зөвхөн хяналтын тоондоо элсүүлдэг болохоор өрсөлдөөн ихтэй зарим нэг мэргэжил дээр (Мэдээллийн технологи гэх мэт) чадалтай хүмүүс бөөгнөрч тэр өрсөлдөөн дундаас гарч ирсэн ганц хоёр хүн л суралцах эрхийг авдаг. Гэтэл зарим нэг мэргэжил дээр өрсөлдөөн бараг байхгүй сулхан хүүхдүүд амархан тэнцсэн байдаг. Зарим жилүүдэд хүний суралцахийг хүссэн мэргэжилүүд зарлагддаггүй тул гадаадад суралцах их хүслээсээ болоод хүсээгүй мэргэжлээрээ суралцах тохиолдол ч зөндөө байдаг шүү дээ.


2. Иж бүрэн тэтгэлэгт хөтөлбөр:
XXI зуун сан нь сонгосон хүмүүстээ БНСУ-д суралцах хугацааны сургалтын төлбөр, байр, амьдрах зардал цаашлаад сургууль төгсөх үед нэг жилийн хугацаатайгаар БНСУ-д ажиллах боломж internship-ээр хангах зэрэг дэмжлэгийг үзүүлдэг.
Суралцах хугацааны туршид аяллаар явах, баяр ёслолын үеээр хүлээн авалт хийх, янз бүрийн үзвэр үзүүлэх, амралт зугаалгаар явах зэрэг олон янзын програмуудыг зохион байгуулж суралцахаар ирсэн оюутнуудийг хоорондоо улам дотносон нөхөрлөж, эв нэгдэлтэй хүчтэй нэгэн цул хамт олон (community) болох үйл явцыг ихээхэн дэмжин тэтгэдэг.

3. Нэгэн цул хамт олон-хүчтэй коммюнити
Тиймээ. Өөр бусад тэтгэлэгт хөтөлбөрүүдээс ялгаатай нь гэвэл энэ сангийн шугамаар ирсэн оюутнууд харьцангуй цөөн хэдхэн сургуульд (голчлон Инха ба Нисэхийн их сургуульд) төвлөрч суралцах бөгөөд хоорондоо дотносон нөхөрлөж нэг үеийн (нэг жил сонгогдон суралцахаар ирсэн) оюутнуудын хооронд дунги 동기(同期), дээд доод үеийн оюутнуудын хооронд сонхүбэ 선후배(先後輩, дээд доод курсын оюутнуудыг ба тэдний хоорондын харилцааг хэлнэ. Энэ нь Солонгос, Японы соёлд ахмад оюутнууд дүү нартаа харамгүй зааж сурган чадах бүхнээр туслах бөгөөд дүү оюутнууд ахмадыг хүндэтгэн зааж сургасан зүйлсийг хичээнгүйлэн тусган авч улам сайжруулан дараагийн хойч үедээ уламжлуулан үлдээдэг, тэдэндээ тусладаг нэгэн тийм цикл харилцаа юм.)-гийн хоорондын харилцаа жинхэнэ утгаараа явагдаж байдаг. Чухам энэ харилцааг улам бадруулан хөгжөөхийн тулд XXI зуун сангийн зүгээс нийтээрээ хийх үйл ажиллагааг харамгүй дэмжин тэтгэдэг.

Сангийн оюутнууд хамт олноороо янз бүрийн арга хэмжээнд оролцож(Солонгост суралцагч Монгол оюутны холбооний үйл ажиллагаануудад идэвхтэй, нэг багийн зохион байгуулалттайгаар оролцож ирсэн), зохион байгуулалцах гэх мэтээр teamwork-д суралцан бие биеээ улам сайн танин мэдсэнээр цаашлаад нийгэмд гарсаны дараа хамтран ажиллах үед бусдаас илүү хялбарханаар гар, бие, сэтгэл гурав нийлэн ажиллаж чадах юм.

Тэтгэлэгт хөтөлбөрт хамрагдан ирсэн хүний хувьд мэдээж БНСУ-д суралцан мэргэжил эзэмшиж ингэснээрээ нэг томоохон хөрөнгө оруулалт болох тодорхой шатны боловсролийг өөрийн биед хийхээс дутуугүйгээр хэдэн арван (Одоогийн байдлаар нийт 11 үеийн 50 шахам хүн энэ тэтгэлэгт хамрагдан суралцан төгсөж, суралцаж байна) цаашлаад энэ тэтгэлэгт хөтөлбөр хэдэн арван жил үргэлжилнэ гэж төсөөлөхөд тэр олон хүмүүсийг 동기(同期), 선후배(先後輩) холбоогоор нягт дотно наасан энэ "XXI зуун сангийн оюутан төгсөгчдийн network" илүү том шавхагдашгүй, хүчтэй, нөлөөтэй, найдвартай ар тал болж чадах ХАМГИЙН ТОМ ХӨРӨНГӨ ОРУУЛАЛТ болох юм шүү.

Ер хүн гэдэг бол хамгийн дээд зэргийн хөрөнгө оруулалт хийх эд 최고투자대상(最高投資對象), үүний дараа үр шимийг хамгийн сайнаар хүртэх боломжтой тул хэнбугай ч гэсэн хүнийг дээд зэргээр 대접(待接) хийж (хүндлэн зочлож гэхүү, миний ядмаг буулгаснийг өршөөнө биз ээ) явахыг хичээвээс зохино гэж миний бие санадаг юмаа.

4. Солонгос улс:
Харьцангуй тайван гэмт хэрэг зөрчил бага буу шийдэмгүй орчин, зөөлөн дулаан цаг агаар, Эх оронтой минь газарзүйн хувьд ойрхон байрлал, IT-ийн хүчирхэг гүрэн, ард түмэн нь боловсролоор хэт хөөцөлдсөний үр дүнд сургууль боловсролын байгууллагууд хүчирхэг, сургалт нь чанартай, оюутан сурагчид нь хичээнгүй, бүгд сурахын төлөө үнэн чармайдаг уур амьсгал гээд тоочвол сурах боловсрох сайхан нөхцөлүүд зөндөө байнаа...

Товчхондоо иймэрхүү.

Солонгос улсад XXI зуун сангийн тэтгэлэгт хөтөлбөрөөр сонгон суралцуулах нь

Миний бие 2002 онд БНСУ-д XXI зуун Солонгос судлалын сангийн тэтгэлэгт хөтөлбөрийн хүрээнд суралцахаар ирсэн билээ.
2002 оны хавраас 2006 оны хавар хүртэл бакалаврын зэргээр суралцаж төгссөн бөгөөд одоо БНСУ-ын Нисэхийн Их сургуульд Мэдээллийн технологийн мэргэжлээр Ubiquitous Sensor Network Security чиглэлээр магистрантурд суралцаж байна.

Энэ бичлэгээрээ та бүхэнд уг тэтгэлэгт хөтөлбөрийн талаар танилцуулъя гэж бодлоо..

XXI зуун Солонгос судлалын сангийн тэтгэлэгт хөтөлбөр нь 1998 оноос хойш жил бүр таван оюутныг Монгол улсаас сонгон шалгаруулж БНСУ-д суралцуулдаг байсан бөгөөд суралцах хугацааны сургалтын төлбөр, байр, хоол, амьдрах зардал зэргийг бүрэн хариуцахаас гадна төгссөний дараа БНСУ-д жилийн хугацаагаар intership хийлгүүлэх зэргээр бүх талын дэмжлэгийг үзүүлдэг иж бүрэн тэтгэлэгт хөтөлбөр юм.
Харин 2006 оноос шалгалтын хэлбэр өөрчлөгдөж улмаар жил бүр 10 оюутныг суралцуулах болсон. Үүнд бакалавр болон магистраар БНСУ-ын Инха Их Сургууль, Нисэхийн Их Сургууль, Ихуа Эмэгтэйчүүдийн Их Сургууль, Халлим Их Сургуулиудад суралцуулах юм. Оюутан сонгох шалгалтанд мэргэжил харгалзахгүйгээр их дээд сургуулийн нэг, хоёрдугаар курсын оюутнууд бакалаврын түвшинд, их дээд сургууль төгсөгчид магистрын түвшинд өрсөлдөх боломжтой.
Тэнцсэний дараа цөөн хэдэн мэргэжлээс бусад (Анагаах ухаан, Гадаад хэл, Боловсрол судлал зэрэг) өөрийн хүссэн мэргэжлээрээ суралцах боломжтой. Тэнцэгчид ихэвчлэн Мэдээллийн технологи, Биотехнологи, Эдийн засаг зэрэг салбаруудийг сонгон суралцдаг. Сонгон суралцуулах процесс нь дараах үндсэн хэдэн үе шаттай
Үүнд:
I. XXI зуун сангаас явуулах сонгон шалгаруулалт
II. Солонгос хэлний бэлтгэл
III. Солонгос хэлний түвшин тогтоох шалгалт
IV. БНСУ-д суралцуулах
эдгээр болно.

I. XXI зуун сангаас явуулах сонгон шалгаруулалт
XXI зуун сан нь сонгон шалгаруулалтаа 2006 оноос эхлэн жил бүрийн 6 сард явуулах болсон ба шалгалт авахаас сарын өмнө томоохон их дээд сургуулиуд болон хэвлэл мэдээллийн хэрэгсэлүүдээр шалгалтын талаар дэлгэрэнгүй зарладаг.
Шалгалт нь дараах гурван хэсгээс бүрдэнэ:
1. Математикийн шалгалт
2. Англи хэлний шалгалт
3. Ярилцлага
Математикийн шалгалт ба Англи хэлний шалгалтыг нэг өдөр авах ба материал нь XXI зуун сангаас бэлтгэгдэн ирнэ. Математикийн шалгалт нь ерөнхий боловсролын сургууль болон дээд сургуулийн суурь мэдлэг дээр тулгуурлаж тестээр авна. Англи хэлний шалгалт нь дүрэм, үгсийн сан, уншлага, сонслого гэх мэт ерөнхий англи хэлний түвшинг шалгах зорилготой бөгөөд ETS(Educational Testing Service Princeton, USA)-ээс явуулдаг TOEIC® - Test of English for International Communication шалгалттай төстэй. Математик, англи хэлний шалгалтын нийлбэр оноогоор дээгүүр жагссан хүмүүс ярилцлаганд уригддаг.
Ярилцлага нь эдгээр гурван шалгалтууд дундаас хамгийн чухал шийдвэрлэх шалгалт болно. XXI зуун сан ба Боловсролын яамны төлөөлөгчид мөн орчуулагчийн бүрэлдэхүүнтэй хэдэн хүн ярилцлагыг явуулна. Ярилцлага англи хэл дээр явагдах бөгөөд тусгай заасан дүрэм байхгүй. Энэхүү шалгалтнаас уг хүний тухай ерөнхий мэдээллийг олж авах учраас хувцаслалт, биеэ авч явах байдал, үг яриагаа анхаарах нь зүйтэй юм. Ярилцлаганд орохын өмнө өөрийн сурч буй мэргэжлийн онцлог, сонгох болсон шалтгаан, цаашдаа Монголын төлөө юу хийх хүсэлтэй зэрэг ерөнхий зүйлүүдэд тодорхой хэмжээнд бэлтгээд орвол сандарч тэвдэхгүйгээр илүү оновчтой хариулахад дөхөмтэй. Ярилцлаганд тэнцсэн тохиолдолд Улаанбаатар дээд сургууль дээр 6 сарын хэлний бэлтгэл хийх ба бэлтгэлийн сүүлээр Солонгос хэлний түвшин тогтоох шалгалт өгнө.

II. Солонгос хэлний бэлтгэл
Солонгос хэлний бэлтгэлийг Улаанбаатар дээд сургууль дээр 6 сараас 1 сар хүртэл 6 сарын хугацаанд хийдэг. Хичээл 9:00~15:00 цагийн хооронд явагдаж үүний дараа өөрсдөө бие дааж давтана. Хичээлүүд нь Солонгос хэлний дүрэм, яриа, уншлага, ханз, үгсийн сан зэрэг ба ихэнхи хичээлийг Солонгос багш нар заадаг. Энэ хугацаанд Солонгосын түүх, соёл, амьдралын хэв маяг, соёлын талаар тодорхой хэмжээний мэдлэг олж авахаас гадна зун Солонгос оюутнуудтай хамт хичээллэж, аялалаар явах зэргээр ойр дотно найзлаж нөхөрлөх боломжтой байдаг.

III. Солонгос хэлний түвшин тогтоох шалгалт
Олон улсын хэмжээнд авдаг Солонгос хэлний түвшин тогтоох шалгалт нь бичгээр болон компьютерээр гэсэн хоёр хэлбэрээр явагддаг. Бичгийн шалгалт нь жилийн тодорхой тогтсон хугацаанд өгдөг байхад компьютерээр авдаг шалгалт нь жилийн 365 хоногийн хүссэн өдрөө өгөх боломжтой. Үүнээс хэлний бэлтгэлийн оюутнууд KLPT (Korean Language Proficiency Test) буюу Солонгос хэлний түвшин тогтоох шалгалтыг компьютерээр өгөх юм. Энэхүү шалгалт нь Солонгос хэлний сонсгол, дүрэм, үгсийн сан, уншлага, ярилцлага гэсэн хэсгүүдээс бүрдэж ойролцоогоор 2 цаг орчим үргэлжилнэ. Шалгалтын талаархи дэлгэрэнгүй мэдээллийг www.klpt.org хаягаар авах боломжтой.
Уг шалгалтанд дундаас дээш түвшний оноо авч байж таныг БНСУ-д суралцуулах эцсийн шийдвэр гарна. Гэхдээ энэ бүх хугацаанд хэлний шалгалтанд унасан хүн гараагүй бөгөөд бүх тэнцэгчид хэлний бэлтгэлийг хичээнгүйлэн хийж шалгалтанд хангалттай заримдаа гайхмаар өндөр оноо авцгааж байсан.
Үнэндээ монголд Солонгос хэлний мэргэжлийн ангийн оюутнууд 2 жилээс дээш хугацаагаар суралцаж байж дундаас дээш түвшний оноо авдаг ч (хэлэндээ сайнууд нь) сонгон шалгаруулалтад тэнцэгчид оюуны потенциал, сурах арга барил, хичээл зүтгэл зэрэг аль ч талаараа шилдэг байдаг тул энэ зэргийн давааг түүртэх юмгүй давцгааж ирсэн.

IV. Ингээд эцэст нь та БНСУ-д суралцахаар Инчоны нисэх буудалд хүрээд ирнэ дээ. Үүнээс хойш өөрийгөө илүүтэйгээр нээн илрүүлж улмаар ирээдүйгээ илүү сайн сайхнаар бүтээн босгох болно гэдэгт XXI зуун сангийн тэтгэлэгт хөтөлбөрөөр суралцагч, төгсөгч бүх хүмүүс итгэлтэй байна.